حضرت براء رضی اللہ عنہ سے روایت ہے کہ آنحضرت ﷺ کو میں نے عید کے دن خطبہ پڑھتے سنا ۔آپؐ نے فرمایا پہلا کام جو ہم سب اس دن کرتے ہیں وہ نماز ہے پھر لوٹ کر (بقر عید میں) قربانی کرتے ہیں جو کوئی یہ کرے وہ ہمارے طریق پر چلا۔

حضرت انس رضی اللہ عنہ سے روایت ہے کہ آنحضرت ﷺ عیدالفطر کے دن جب تک کچھ کھجوریں نہ کھالیتے نماز کو نہ جاتے اور آپ نے کہا کہ آپؐ طاق کھجوریں کھاتے۔

حضرت عبداللہ بن عمر رضی اللہ عنہ سے کہ آنحضرت ﷺ عیدالاضحٰی اور عیدالفطر میں پہلے نماز پڑھتے پھر نماز کے بعد خطبہ سناتے۔

حضرت ام عطیہ رضی اللہ عنہا سے روایت ہے انہوں نے کہا (آنحضرت ﷺ کی طرف سے) ہم کو عید کے دن نکلنے کا حکم ہوتا یہاں تک کہ کنواری عورت بھی پردے میں سے نکلتی اور حائضہ بھی نکلتیں۔ وہ لوگوں کے پیچھے رہتیں مردوں کے ساتھ تکبیر کہتیں اور ان کی دعا میں شریک ہوتیں اس دن کی برکت اور پاکیزگی حاصل کرنے کی امید رکھتیں۔

حضرت جابر ضی اللہ عنہ سے روایت ہے کہ آنحضرت ﷺ جب عید کا دن ہوتا تو ایک رستے سے عید گاہ کو جاتے اور دوسرے رستے سے آتے۔

حضرت جابر بن عبداللہ رضی اللہ عنہ سے روایت ہے کہ میں رسول کریم ﷺ کے ساتھ عید کے دن نماز کے لئے حاضر ہوا تو آپؐ نے اذان اور اقامت کے بغیر نماز پڑھائی۔ خطبہ سے پہلے بلال رضی اللہ عنہ سے ٹیک لگاکر کھڑے ہوگئے۔ اللہ تعالیٰ سے ڈرنے کا حکم دیا اور اس کی اطاعت کی ترغیب دی اور لوگوں کو وعظ و نصیحت کی۔ پھر عورتوں کے پاس جاکر ان کو وعظ و نصیحت کی اور فرمایا صدقہ کرو کیونکہ تم میں سے اکثر جہنم کا ایندھن ہیں۔ عورتوں کے درمیان سے ایک عورت نے کھڑے ہوکر عرض کیا۔ کیوں؟ رسول کریم ﷺ نے فرمایا کیونکہ تم شکوہ زیادہ کرتی ہو اور شوہر کی ناشکری بھی۔ عورتیں اپنے زیوروں کو صدقہ کرنا شروع ہوگئیں۔ بلال رضی اللہ عنہ کے کپڑے میں اپنی بالیاں اور انگوٹھیاں ڈالنے لگیں۔

حضرت ابوہریرہ رضی اللہ عنہ سے روایت ہے رسول اکرم ﷺ نے عیدالاضحٰی اور عیدالفطر کے دن روزہ رکھنے سے منع فرمایا ہے۔

حضرت انس رضی اللہ عنہ بیان کرتے ہیں کہ رسول اللہ ﷺ مدینہ تشریف لائے تو ان (اہل مدینہ) کے لئے دو دن کھیل کود کے لئے مخصوص تھے آپؐ نے دریافت کیا یہ دو دن کیسے ہیں؟ (ان دنوں کی اہمیت کیا ہے) ۔انہوں نے جواب دیا زمانہ جاہلیت میں ہم ان دنوں میں کھیلا کرتے تھے پس رسول اللہ ﷺ نے فرمایا اللہ تعالیٰ نے تمہیں ان دنوں کے بدلہ میں دو بہتر دن عطا کردیئے ہیں یوم الاضحٰی اور یوم الفطر۔

حضرت جابر بن سمرہ رضی اللہ عنہ بیان کرتے ہیں کہ میں نے نبی ﷺ کے ساتھ نماز عید ایک یا دو بار نہیں (بلکہ متعدد بار) اذان اور اقامت کے بغیر پڑھی ہے۔

حضرت عائشہ رضی اللہ عنہا سے مروی ہے کہ رسول اللہ ﷺ عیدالفطر اور عیدالاضحٰی کی پہلی رکعت میں سات اور دوسری میں پانچ تکبیریں کہا کرتے تھے۔